مانع تدفق التيار-السيرچ Surge Protection Device – ما هو وما أهميته؟

علشان كبل يعدي فيه تيار كهربي، لازم يكون فيه فرق جهد بين أول الكبل ده وآخره، وفرق الجهد ده بيتقاس بالڤولت. بالظبط زي لو عندي تنك ميه مليان في ناحيه، وتانك تاني فاضي الناحيه التانيه، ووصلتهم ببعض بخرطوم، الميه حتمشي من التنك المليان للفاضي. التيار الكهربي بيتحرك في حالة وجود ڤولت، لو الڤولت بقي صفر، مفيش تيار حيمشي، بالظبط زي لما الميه تملا التنك التاني قد الأولاني، مفيش ميه (تيار) حيمشي لأن فرق الجهد بينهم (إرتفاع الميه) حيكون صفر.

طيب الڤولت ده بيعلي أو بيوطي بناءا علي إيه؟ لو مثلناها تاني بتنكين الميه، كل ما التنك الأول يكون مليان أكتر، أو إرتفاعه أعلي أكتر، الميه حتمشي أسرع لأن ضغطها أعلي، يعني سرعتها أعلي لأن الخرطوم قطره ثابت، أو بمعني كهربي، ڤولتها أعلي.

في تصميم الدواير والأجهزه الكهربيه، الڤولت لازم يكون ثابت علي رقم معين، يعني سرعة مرور التيار في الأسلاك ثابته، وبيكون فيه تغير مسموح بيه بنسبه معينه مش كبيره، وإلا يحصل مشاكل كتيره، مواتير تتحرق لو الڤولت عالي عليها، دواير إلكترونيه طبعاࣰ بتشيط لو الڤولت الداخل علي وهي مش متصممه لتحمله، وهكذا.

هل أي إرتفاع في الڤولتيه يعتبر “سيرݼ”؟ لأ مش بالضبط. علشان الإرتفاع ده يتسمي إرتفاع مفاجئ، لازم يكون إيه؟ مفاجئ…واضحه يعني 😁😁 مفاجئ إزاي؟ يعني سريع مش متدرج…سريع قد إيه؟ يعني بيعلي عشرات أو مئات الڤولتات في أجزاء من الثانيه.

المشكلة؟

إيه هو تأثير الإرتفاع ده؟ حاجات كتير، أولهم وأعلاهم تكلفه: تلف الإنڤرتر سواء كان السيرچ جاي من ناحية الدخول – جانب الDC – أو من ناحية الخروج – جانب الAC.

في حالة إن الإنڤرتر إستحمل شويه وفترة الإرتفاع المفاجئ دي عدت بسلام من غير تلف كامل، مكوناته الداخليه بتكون إتأثرت جداً وعمره بيقصر جامد، وفي الأغلب حتي أجود أنواع الإنڤرترات مش بتقدر تتحمل سيرݼ أكتر من مرات قليلة وكل مرة منهم بتبقي كارثة علي مكوناته.

المشكلة الأكبر هنا إن الإرتفاع المفاجئ ده بيرفع درجة حرارة الكبل والموصلات – الMC4 في حالتنا هنا – لدرجة عالية وبيكون عندنا إحتمال كبير إن الكبل ينهار وممكن جداً يبتدي حريق 🔥🔥- ودي طبعاً مشكلة كبيرة. إنهيار الكبل هنا عامل زي خرطوم الميه اللي بين التنكين – فاكرينه؟ تخيل ضغط الميه زاد مره واحده…الخرطوم حيفرقع

هنا بقي دور الحارس، مانع إرتفاع التيار المفاجئ، مانع السيرݼ

الSurge Protector أو الSurge Protection Device أو إختصاراً زي ما بنقول عليه “سيرݼ” هو ببساطة نقدر نقول عليه محبس ضغط 😎😁، مش إحنا قلنا الڤولت هو الضغط اللي بيخلي الكهربا تمشي من نقطه لنقطه تانيه؟ وكل ما الڤولت يزيد يبقي أكننا بنزود الضغط؟ ولما الضغط ده يعلي مره واحده يبقي المفروض إيه اللي يحصل؟ 🤔 ببساطة، المحبس يفتح بسرعه، يفرغ الضغط الزيادة ده، وأول لما يرجع طبيعي يقفل تاني…طيب في الكهربا حيحصل إيه؟ أول ما يحصل إرتفاع مفاجئ الSPD فوراً “بيفتح” قناه فرعيه الكهربا تعدي منها…طيب واحد يسألني، حتعدي تروح فين؟ 🙄🙄

السيرݼ لازم يكون مربوط علي أرضي earth وده يعتبر الخروج بتاعه…أول ما الڤولت يعلي، السيرݼ يفتحله طريق بدل ما يكمل للإنفرتر، يتجه للأرض ويفضل الحال كده طول فترة الطوارئ دي، أول ما تخلص، يقفل تاني. فكره بسيطه وسهله، بيها نقدر نحمي الأجهزة ونتفادي حرايق محتمله.